Ukrayinada Rusiye akimiyeti tarafından 14 yılğa üküm etilgen qırımtatar vatandaş jurnalisti Osman Arifmemetovnıñ kitabı neşir etildi. «Menim sürgünligim. Qırımlı jurnalistniñ SİZOda yazılğan haberleri» adlı kitap çıqtı, dep bildirdi ZMINA insan aqları merkeziniñ yolbaşçısı Tetâna Peçonçık.
«Kitap qırımtatar vatandaş jurnalistiniñ farqlı tahqiqat izolâtorları ve apishanelerde – Aqmescitten Minusinskke qadar – yazğan haberlerinden ibaret. Müellif apishane kameralarındaki yaşayışnıñ aqiqatları, mabüsler oğrağan zorbalıq ve Rusiyeniñ mahkeme sistemasındaki falsifikatsiyalarnı tafsilâtlı tasvir ete. Osman sert şaraitlerge baqmadan, iman, sağlam aqıl ve ince kinayeli sözlerni saqlap qalğan, qaydlarında ise halqınıñ taqdiri oğrunda yañı küreşke ümüt ve azırlıq tolu», – dep yazdı Peçonçık Facebook saifesinde.
Kitap Çeh Cumhuriyetiniñ Ukrayina elçihanesiniñ yardımınen «Vihola» neşriyatında ukrayince basıldı. Metinlerni Mariya Gorbaç tercime etti, kiriş sözni ise Ukrayinanıñ Türkiye elçisi Nariman Celâl yazdı.
Osman Arifmemetov alâ daa Rusiye apsinde qala. «Qırım birdemligi» bildirgenine köre, Osman Arifmemetovnı Minusinskteki apishaneden çıqarıp, Çelâbinsk SİZOsına avuştırğanlar. Soy-soplarına yazğan mektübinde etap şaraitlerini tarif etip, 1944 senesiniñ qırımtatar sürgünliginen qıyasladı.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
2022 senesi noyabrniñ 24-nde Rostov-na-Donudaki Cenübiy arbiy okrugınıñ mahkemesi mabüslerni terror faaliyetinde ve akimiyet zapt etmege tırışqanlarında qabaatladı. Faaller Enver Ametov ve Yaşar Muyedinov 13 yıl sert rejimli koloniyada, vatandaş jurnalistleri Ruslan Suleymanov, Rustem Şeyhaliyev ve Osman Arifmemetov 14 yıl koloniyada qalmasına üküm etildi. Mabüsler 4 yılnı apishanede keçirecek, soñra daa 1 yılğa areket serbestligi sıñırlanacaq. Mabüsler özüni qabaatlı olaraq tanımayıp, siyasiy taqip olğanını tüşüneler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
