«Sarı şerit» areketiniñ faalleri işğal etilgen Qırımda yañı tirenüv aktsiyasını keçirip, Ukrayina timsallerinen stiker, levha ve risalelerni tarqattı. Bu aqta faallerniñ Telegram kanalında aytıla.
Kezlevde timsaller Odun bazar qapusı yanında peyda oldı. Yaltada – «Yalta» musafirhanesi yanında. Aqmescitte – şeerniñ bir çoq soqağında ve kirişlerde.
Faaller tirenüv timsallerini qaldırğan yerlerden fotoresimler derc etip, bu adiy bir aktsiya degil, dep qayd ete – bu yarımada sakinleriniñ azat etilüvini beklegenini ve işğalge razı olmağanlarını köstere.
«Er bir fotoresim – bu Qırım Ukrayina olğanınıñ delilidir, insanlar teslim olmadı, işğal bitmesini bekley ve mıtlaq körerler», – dep qayd ete «Sarı şerit».
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
