Rusiye ordusı mayısnıñ 23-nde Odesanıñ liman infrastrukturasına eki ballistik raketa ile ücüm etti, dep bildirdi vilâyet arbiy memuriyetiniñ yolbaşçısı Oleğ Kiper.
Onıñ malümatına köre, ücüm neticesinde liman işçisi elâk olğan.
Daa sekiz insan yaralanğan, olardan dörtü ağır alda, ekisi orta ağır alda ve daa ekisini yaralanması yengil. Ekimlerimiz olarğa bütün kerekli yardım köstere ve er kesniñ ayatı ve sağlığı içün küreşe", — dep qayd etti Kiper.
Evelden ava quvetleri cenüpten ballistik silâ qullanuv telükesi aqqında tenbiley edi. Odessa vilâyetinde eki saat içinde eki kere ava telükesi ilân etildi.
Rusiye arbiyleri Ukrayina regionlarına çeşit silâ qullanıp ücüm ete.
RF reberligi, Rusiye ordusı büyük cenk vaqtında Ukrayina şeerleri ve köyleriniñ grajdan infrastrukturalarına maqsatlı darbelerini endirip, ealini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
