Rusiye ordusı mayısnıñ 23-nde gece Ukrayinağa ücüm etkende 175 uçucısız uçaqnı qullandı, dep bildire cuma künü Ukrayina Arbiy-ava quvetleriniñ komandanlığı.
Ukrayina komandanlığınıñ malümatına köre, uçaqlarnı Millerovo, Kursk ve Primarsk-Ahtarsktan uçurğanlar. RF ordusı Ukrayinağa Rostov vilâyetinden "İskander-M" ballistik raketası ile ücüm etti.
Saat 13:00-ge qadar, Ukrayina Silâlı quvetleriniñ ava mudafaası şarqiy, şimaliy-ğarbiy, cenübiy ve merkeziy Ukrayinada "Şahed" ve diger tiplerniñ 150 Rusiye uçağını yoq etkenini bildire:
"91 — ateş aletleri ile urulıp tüşürilgen, 59 — ğayıp etilgen ya da REB tarafından bastıtılğan".
Ücüm neticesinde Sumşçına, Dnipropetrovşçına, Doneççına, Harkivşçına, Kıyivşçına, Jıtomirşçına, Odeşçına, İvano-Frankivşçına zarar körgen, dep qoşa ukrayin arbiyleri.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
RF reberligi, Rusiye ordusı büyük cenk vaqtında Ukrayina şeerleri ve köyleriniñ grajdan infrastrukturalarına maqsatlı darbelerini endirip, ealini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
